Tiaan Slabbert is ’n veelbekroonde verhoogakteur en stemkunstenaar, bekend vir sy werk in Takalani Sesami, waarvoor hy ’n SAFTA-nominasie ontvang het. Hy het onder meer ’n Blou Fiësta, Broadway World Award en Naledi-toekenning verwerf vir sy spel in Porselein by die SA Staatsteater.

As eienaar van What Walrus?, ’n opvoedkundige kinderteatermaatskappy, beywer Tiaan hom vir “edu-tainment” en die bevordering van teater onder jong leerders. Hy was ook te sien in verskeie KykNET-produksies soos Getroud met Rugby, Knapse Kêrels, Spoorloos 4 – Die Eiland, en verskeie storiefilms waaronder Drie Ja’s en ’n Nee en Boetie Ontmoet ’n Alien.

Tiaan speel in Brakpan Boudoff en Vetkoekpaleis 2, en verskyn as Buks in Molly en Wors hou Kerfees. Internasionaal maak hy sy debuut op Netflix in Amandla, en op Showmax in Daar’s Bloed.

Hy gee ook klas as lektor in verhoog- en fisiese teater aan PALI (Performing Arts Life Institute) en toer tans met sy eenmanvertoning Hans Bars die Bioborrel.

Afrikaans Onderwyskundige | Senior Onderwysspesialis | Moderator | Mentor

Afrikaans is my huistaal én passie. Ek is toegewyd daaraan om die taal met entoesiasme te onderrig en leerders te help om vaardig te word in ’n taal wat hul deelname as opgeleide landsburgers bevorder.

Met meer as 40 jaar se ervaring, insluitend 12 jaar as Senior Onderwysspesialis: Afrikaans (Huistaal en EAT), het ek diepgaande kennis van die KABV, Nasionale Kurrikulumverklaring en onderwyswetgewing ontwikkel. Ek was aktief betrokke by nasionale en provinsiale opleiding, moderering, monitering, eksaminering en die ontwikkeling van lesplanne en studiegidse.

Ek glo ons talente wissel van uitvoerend tot waarderend, en soms het ons die een of die ander, en andersyds het ons ‘n kombinasie daarvan. Ek is dankbaar dat my kunstalente my toelaat om te skep, te leer, te waardeer en te beoordeel. 

My kunsstudies was by TUKS en daarna het ek my HOD by Kovsies voltooi. 

Privaat-kunsklasse vir kleuters tot volwassenes was nog altyd deel van my lewe. 

Ek was vir 17 jaar lank in die Visuele Kunsklas betrokke as onderwyser en vakhoof vir graad 8-12, en was sedert 2012 die hoofmerker van graad 12 Visuele Kuns en Ontwerp in Limpopo, en het op die nasionale paneel gedien vir memorandumbesprekings vir beide teorie en prakties. Huidig is ek in diens van die onderwysdepartement as die hoof moderator vir Visuele Kuns en Ontwerp in Limpopo. 

Ek was by verskeie kunstefeeste betrokke as beoordeelaar van kuns en fotografie en het self ‘n passie vir fotografie. My verantwoordelikhede by skooljaarblaaie as die skoolfotograaf, en kortkursusse in fotografie, vorm deel van my ervaring. 

Ek is altyd besig om kunsvorms, tegnieke, kunstenaars en bewegings te bestudeer en vind daagliks inspirasie wat ‘n voedingsbron is vir siel en gees. My kunstenaarskap is ‘n genadegawe waarmee ek my Skepper wil eer.